الجمعة، 20 يونيو 2008

عاوز اشتري عربية

الموضوع ده كنت ناوي اكتب فيه قبل الواجب اللي فاجأني و ماعرفتش افلفص منه وبعدين انقطاع النت اللي عطلني يومين
الموضوع وما فيه اني عاوز اشتري عربية
طبعا باجيب جرايد اعلانات السيارات و الوسيط وقاعد اعمل دراسات جدوي للامكانيات المتاحة واسعار السوق جديد و مستعمل
وطبعا باخد راي زملائي بالعمل
قام واحد منهم اشار علي بشورة غريبة
ان فيه ناس ممكن تجيب لك عربية استعمال الخارج بس ايه بريفكس وعليها اعفاء جمركي ليه بقي ياسيدي
لأنها هاتخش باسم معوقين
بس انا مش معاق والحمدلله وزي الحصان قال لك لأ الناس دي هاتجيب الأخ المعاق وتتفق معاه وتدي له قيمة سبع تمن تلاف جنيه وتطلع الأفراج الجمركي باسمه وتمضيه علي ايصال امانة بقيمة العربية وانت ما عليك الا انك تدفع تمن العربية و الأكراميات وبرضه تلاقي نفسك موفر قيمة عشرة الاف حنيه عن اللي زيها في السوق زائد انها استعمال الخارج بس هاتمشي بيها والرخصة باسم الشخص الأولاني علشان عليها حظر بيع
طيب حد يفهمني في الليلة دي كله مين بيسرق مين؟؟؟؟؟؟؟؟؟؟
بصراحة انا مش مطمئن وفي نفسيتى حاجة ولذلك رفضت الموضوع من اساسه

هناك 3 تعليقات:

همس يقول...

اولا ربنا يوفئك وتشتريها

ثانيا / انافعلا سمعت عن موضوع عربيات المعاقين دى

بس طالما مش هتتكتب باسمك اظن يبقى من الضمان بلاش محدش ضامن الناس دى

واكيد لو حصل اختلاف لقدر الله

مش هتعرف تاخد حقك وهيبقى فيها مسئوليه قانونيه

اما من ناحيه مين بيسرق مين

الله يحرقها الحكومة هيا السبب ان كل حاجه تعملها تفتح قدام الناس ميت باب علشان السرقه


ربنا يهديك لما فيه الخير

تحياتى

سبهللة يقول...

كويس انك رفضت الموضوع يا استاذ طارق
اقولك ليه
انا ليا صديقة معوقة وفعلا اشترت عربية من بور سعيد وكانت سيات ابيزا
واشترتها من كام سنة يمكن سنتين او تلاتة ب 22 الف ج ولما قلت لها دى كدة تبئى غالية او على الاقل زى سعرها هنا فى القاهرة
قال لى لا بس دى وارد الخارج وما اتبهدلتش على ارض مصر ومطبات مصر
ومن يوم ما جابتها وهى عاملة اشتراك عند الميكانيكى والعربية مطلعة عينيها
احسن حاجة يا استاذ طارق انك تمشى فى السليم
بس خد بالك حاول تجيب سيارة موديل جديد لان الموديلات القديمة هايعملولها قانون فى مجلس الشعب عشان تتعدم والبلد تفضى لسيارات علية القوم
يعنى حاول تشتريها موديل التسعينات
لانى انا شخصيا كنت هاشترى سيارة بيتلز تانى والكلام دة كان من اسبوع تقريبا واخويا نبهنى انها ما تساويش حاليا بعد موضوع القانون دة وان لو حبيت ابيعها بعد كدة مش هاعرف
خد بالك
وربنا يوفقك لما فيه الخير لك ولأسرتك الكريمة

Foxology يقول...

برافو عليك يا استاذ طارق والله كدة الواحد هيبقى بيضحك على نفسه قبل ما يضحك على الناس ده غير انه بيشجع الألتفاف غير القانونى حوالين الحاجة

تحياتى وربنا يوفقك :)