الجمعة، 4 سبتمبر 2009

رمضانيات 3

أمران ينغصان علي اثناء صلاة القيام بالمسجد
الأمر الأول هو ضجيج الأطفال وصخبهم و جريهم بين الصفوف
مع محاولتي عدم الأنتباه اليهم و محاولة التركيز علي قراءة الأمام
عندما كنت صغيرا في سن السادسة كان ابي رحمه الله يصطحبني و اخي الأصغر للمسجد و كان يحرص علي ان نقف بجواره و الا نبعد عن نظره و عندما كنا نتبادل الدفع و الزق كأطفال كان ينظر بحدة تجعلنا نكف عن الشقاوة و بعد الصلاة يشرح لنا اننا يجب ان نحترم المسجد لأننا في ضيافة الله الذي يطلع علينا وذلك باسلوب بسيط محبب
ما أراه الان ان الرجل يصطحب اولاده للصلاة و هناك يطلقهم ليعيثوا في المسجد لعبا و لهوا و يندمج هو في الصلاة غير ابه لما يسببونه من ضجيج
لماذا اصبح الناس هكذا
الأمر الثاني في البوست القادم
اللهم اني صائم

هناك 7 تعليقات:

حفيدة عرابى يقول...

رمضانيات فى منتهى الجمال
مركزة ومعبرة
زى الكبسولات كده
بس مش كبسولات سمير رجب
اللهم انى صايمه
بس حضرتك لو مضايق
ممكن حد يحكيلك عن اللى بيحصل فى اماكن السيدات
بحس فى الجامع
ان مصلى الرجال كله ملائكه
وبتيجى على بالى افكار مجنونة
انى اتخفى
وانزل اصلى معاهم

tarek momen يقول...

الصديقة حفيدة عرابي
اشكر لك متابعتك
تعليقك ذكرني بشئ مهم
في اي عهد من عهود الدولة الأسلامية تقرر عزل النساء وراء الأسوار في المساجد
معلوماتي البسيطة تقول ان مسجد الرسول في بداية الدولة بالمدينة المنورة كان يشمل صفوف الرجال ثم الصبيان ثم النساء بدون حوائط او ستائر وربما هذا ما كان يمنع الصبيان من الشقاوة لأنهم يصلون امام اعين امهاتهم
اما الان ففي كل المساجد يتم اخفاء النساء عن صفوف الصلاة لماذا لا اعلم وفي اي مذهب لا اعلم واعتمادا علي اي حديث او سنة نبوية لا اعلم
هل تستطيعي القيام ببحث حول هذا الموضوع و اكون لك من الشاكرين
ملحوظة: بلاش سيرة سمير رجب و امثاله اثناء الصيام
اللهم اني صائم

حفيدة عرابى يقول...

استاذ طارق

علم يافندم وجارى التنفيذ
بس فى انطباعات سريعةمش دقيقة ومش موثقة

ان القران والسنة لم يرد فيهم اى نص بالفصل بين النساء والرجال فى المساجد

وحال مسجد الرسول عليه الصلاة والسلام كان زى ماحضرتك ذكرت بالضبط
والدليل الحديث النبوى اللى بيوضح ان خير صفوف الرجال اولها واشرها اخرها وان خير صفوف النساء اخرها واشرها اولها

لكن مع تطور الزمن وانتشار الفتن
رأى البعض الفصل بينهم اعتمادا على ان النبى صلى الله عليه وسلم وضع ضوابط لخروج المرأة للمسجد اهمها عدم الاختلاط وانه عليه الصلاة والسلام كان بيسمح للنساء بالخروج اولا من المسجدولا يخرج هو والرجال الابعد انتهاء خروج السيدات

وكمان مذهب الامام مالك وضع دليل من ادلة الحكم الشرعى هو

المصالح المرسلة

بمعنى ان تشريع الاحكام الغرض منه تحقيق مصالح الناس من جلب نفع او دفع ضرر
مثل حفظ حياة الناس
شرع له القصاص
وحفظ مالهم
شرع له حد السرقة

لكن فى بعض المصالح بتنشأمع التطورومالهاش حكم قاطع ويرى الفقهاء اهميتها للمسلمين
مثلا ا ن الزواج لابد ان يوثق
وضرب النقود
واتخاذ السجون
ومنع عمر بن الخطاب سهم المؤلفة قلوبهم
وتوريث عثمان بن عفان الزوجة التى طلقها زوجهاللفرار من الارث

المصلحة المرسلة احتج بيها المؤيدين لفصل النساء عن الرجال منعا للفتنة


لكن فى خلاف كبير جدا الان
لان فى مذاهب كتير مش موافقه على اعتبار المصلحة المرسلة من ادلة الحكم الشرعى
وفى اراء قوية بترجح عدم الفصل فى المساجد
بل واحيانا بتحرمه وبتعتبر الفصل ده بدعه
ولو وافقت عليه بتوافق بشروط
ان مثلا مايكونش فى حائط يفصل بين الرجال والنساءوانه لابد من رؤية الامام او على الاقل متابعة حركاته وسماع صوته بوضوح
وان يكون مكان النساء ليس محاذيا لمكان الرجال وان كان البعض اجازه
من الناس اللى مش موافقين على الفصل مفتى استراليادعا لكده
ان الحال يرجع زى مسجد النبى صلى الله عليه وسلم

لكن امتى تقرر الفصل بدقة


انا مقدرتش اوصل للاجابة فى البحث السريع



ده الموضوع طلع كبير جدا وانا مش عايشة فى الدنيا

مؤقتا هستحمل السيدات لغاية مايوصلوا لحل المشكلة دى

انا نفسى اتفتحت استفسر عن الموضوع ده

بس معلش رمضان مش مدينى فرصة اقوم بالواجب

تحياتى لحضرتك
وجزاك الله خيرا

tarek momen يقول...

الصديقة النشيطة حفيدة عرابي
جهد مشكور
هاتخليني اطمع اديلك كل المواضيع اللي محيراني تعملي عليها ابحاث
تحياتي

شمس النهار يقول...

صباح الخير ياحاج
والدك الله يرحمه كان من الناس اللي فاهمه الدين صح وبجد وللعباده والمعامله الصح

لكن الان اغلب الناس فاهمه الدين غلط
ونفس الموضوع بيحصل في مكان الستات

وعلي اوسع وضجيج اكبر

احنا عايزين تربيه دينيه من جديد

tarek momen يقول...

الصديقة شمس النهار
منورة
المشكلة ان الناس فاهمة بس مكبرة دماغها
ليه يمكن ضغوط الحياة
بس المشكلة ان الأولاد هايكبروا و ماعندهمش هيبة للمسجد
والا انا ببالغ
مش عارف

سبهللة يقول...

تصدق بالله
انا بطلت اروح اصلى فى الجماع بسبب عدم التركيز لان الستات بتجيب عيالها دة غير الحر الفظيع اللى فى الجماع حتى لو فيه مراوح
الى جانب فى بعض الاحيان رائحة العرق المنبعثة من المصليين
فقلت فى عقل بالى انا اقفل عليا باب اوضتى واصلى على مزاجى واخلص كل يوم جزء
بدل البهدلة دى
بس انا يحق لى اصلى فى البيت لكن الرجالة يا عينى عيلهم
لا يحل لرجل ان يصلى فى بيته بدون عذر كما قال صلى الله عليه وسلم