الاثنين، 7 سبتمبر، 2009

رمضان 5

ذكري غزوة بدر الكبري وده موضوع كبير قوي
مش مركز ..هاحاول اجمع شتات ذاكرتي المبعثرة و اكتب حاجة بعد الأفطار
اللهم اني صائم

الحمد لله افطرنا وكله تمام
في مدينتي مزرعة يمتلكها احد الأثرياء و بجانب الزراعة يقوم بتربية الخيول
ومن كرمه يسمح لأهالي المدينة بزيارة المزرعة و ايضا امتطاء الخيول بأجر رمزي
المهم اخذت عائلتي لقضاء يوم بالمزرعة و هناك طلبت ابنتي ركوب الحصان فاستاجرته لمدة نصف ساعة
ويبدو ان الحصان كان شقي شويه فالبنت خافت و بعد خمس دقائق طلبت ان تنزل فقال لي السايس خلاص اركب انت الحصان باقي المدة
وكانت تجربتي الأولي في ركوب الجياد
المهم تمثلت اني احمد مظهر وركبت الحصان بل ونجحت في الثبات عليه و بدات ادفعه للجري في المضمار متمخترا بكل فخر امام زوجتي التي لم تلق لي بالا و انشغلت باعطاء الساندوتشات لبناتي... ما علينا
و فجأة تملكتني روح القعقاع بن معديكرب جميع ابطال المسلمين واتظاهرت اني ممسك سيفا اضرب به الأعداء بينما اسيطر علي الحصان بيدي الأخري واكتشفت انها مسالة صعبة جدا
وتعجبت كيف كان المسلمون ينجحون في القتال اثناء ركوب الجياد ومنهم كبار في السن
المهم انقضي الوقت المستاجر و حين نزلت من علي الجواد اكتشفت اني غير قادر علي المشي و عندي الام مبرحة بالعصعوص و محتاج اتنين يسندوني
رحم الله المسلمون الأوائل
ده احنا جيل خرع

طبعا ممكن حد يسالني ايه علاقة الكلام ده بغزوة بدر
مالوش علاقة
روحوا مدونة لقد خلقنا الله احرارا تلاقوا هناك بوست عن غزوة بدر
اللهم اني قايم اتسحر

هناك 5 تعليقات:

لقد خلقنا الله احرارا يقول...

كل ذكرى غزوة بدر وحضرتك طيب
طيب استنى لبعدالمغرب
واشوف نتيجة تجميع شتات الذاكرة
ويمكن ربنا يكرمنى واجمع انا كمان

لقد خلقنا الله احرارا يقول...

مين قال مالوش علاقة؟
ده كلام بسيط وعميق وفى الجون
التاريخ موجود فى الكتب
بس مين يقدر يربط بين موقف يبان عادى زى ده000
وبين التاريخ
والاجمل
طريقة السرد
اللى شرحت الموقف كله باختصار
تحياتى للحاجة المهمومة بالساندوتشات
ربنا يعينها

فشكووول يقول...

السلام عليكم طارق بك

كل سنه وانت طيب ورمضان كريم

عارف اللى لفت نظرى فى التدوينه ان السيده زوجتك ولا واخده بالها منك وعماله تعمل سندوتشات للعيان وانت يا عينى تاعب نفسك على الفاضى ... هيا كدا يا طارق بك احنا اخر ناس الستات تبص لهم ما دام فيه عيال وهم الاهم عندهم واحنا بتوقف دورنا على التمويل ...... وبس .

تحياتى طارق بك واهلا بيك ونورتنى بزيارتك وان شاء الله لا تنقطع الزيارات وخصوصا اننا تقريبا من جيل قريب من الاخر

شمس النهار يقول...

يعني ياحاج موتوسيكل وقلنا ماشي اهو طيش شباب وحلم قديم واتحقق

لكن حصان ياكبير حصان

طيب

واخبار ضهرك ايه بقي دلوقتي

سبهللة يقول...

لأ طبعا الكلام ليه علاقة بالغزوة لانههم اكيد حاربوا على خيول
والمقارنة بيننا وبينهم يخلينا نعرف قد ايه المسلمين الاوائل دول تعبوا عشان يوصلوا رسالة الاسلام للعالم
اللى احنا دلوقتى بندوس على كل مجهود عملوه
حيث ان المسلمين حاليا اكتر ناس بتشوه الاسلام وتضره وتأذيه
وسبحان الله