الثلاثاء، 1 سبتمبر، 2009

رمضانيات 2

بالأمس اعدت حرمنا المصون صينية مكرونة بشامل في الفرن علي الأفطار
بصراحة كانت متخدمة كويس و دست في الأكل خرطتين ونص
بعد الفطار حسيت اني متنجر و مش قادر اقوم
كوبايتين شاي و ومش قادر افوق
والشيطان ابتدي يوسوس" مش لازم التراويح النهارده انت تعبان و عايز تنام
نام لك شوية و بعدين ابقي صلي"
نفضت له وقمت اتوضيت و زودت في الميه
واستعنت بالله ونزلت و انا باعاتب نفسي يعني لازم تدبها في الأكل ياخي ده الحديث بيقول ثلث لطعامك و ثلث لشرابك وثلث لنفسك و انت ماخلتش حاجة للنفس
المهم ربنا اعانني و اتميت الصلاة بالمسجد و بعدين و انا خارج لمحت الشيطان بيتواري خلف سور المسجد فاسرعت و راءه وضربته شلوط محترم فقفز صارخا من الألم فلم امهله و عاجلته بالضرب علي قفاه فاصبح محتارا ايحمي مؤخرته ام قفاه فاسرع هاربا و هو يتوعدني قائلا لأغوينك غدا
الهي ربنا يخيب ظنه
اظن ان هذا من تخاريف المكرونة
اللهم اني صائم

هناك 6 تعليقات:

شمس النهار يقول...

كل ده علشان كلت المكرونه من غيرنا ياحاج
وبعدين مافيش شياطين في رمضان اصلا

متسلسله ياحاج


رمضان كريم:)

لقد خلقنا الله احرارا يقول...

مكرونة بالبشاميل
ياه
اغراء قوى جدا
وانا بقول
استاذ طارق
زى بابا فى البلوجر
من غير مااكبر حضرك طبعا
الدليل اهو
توافق فى موضوع المكرونة بالباشميل

كويس ان من اول رمضان الشيطان استخدم الاسلوب ده مرة واحدة

انا ماسك دماغى كتير

لا هى مش من أثر المكرونةولا حاجة
لما بنتغلب على الشيطان فى اى حاجة حتى لو كانت صغيرة

بنحس بسعادة جميلة وانتصار

ربنا ينصرنا دايما

Nostor Azzuro يقول...

شكرا على الزيارة

ويارب تستمر فى الانتصار على الشيطان

رمضان كريم

ولا تنسانا فى الدعاء

العجوز والبحر يقول...

يالهنا و الشفا المكرونه وانت جريت ريقى وانا صايم ولكن مش شيطان تاى جرى
ريقى وكل عام وانت بخير..

فـدوى فـريد فتحى يقول...

مممممممم
ياااه مكرونه ...
صعب الواحد مايدوسش بصراحه ...
بس مبرووك على نصرك المؤزر علي الشيطان
أدام الله أنتصاراتكم عليه ...

سبهللة يقول...

الظاهر ان رمضان خلى دمك شربات