السبت، 13 يونيو، 2009

مشروع مبادرة سلام

تحديث
تم سحب المبادرة بعد خطاب النتن ياهو
ــــــــــــــــــــــــــــــــــ
علي ضوء خطاب السيد اوباما وخاصة الفقرة التي تحدث فيها عن ان المجتمع الأمريكي يتكون من اطياف مختلفة العرق و الدين والتوجهات ورغما عن ذلك تتعايش في سلام
تقريبا ده اللي فهمته من مترجم القناة الأولي
بناء علي هذه الفقرة طق في دماغي اني اعمل مبادرة للسلام مع اسرائيل وذللك بالأصالة عن نفسي فقط وليس بالنيابة عن اي شخص اخر يعني اذ قبلوا المعاهدة يوقعوها معايا شخصيا
المهم بنود المعاهدة
اولا سوف اعترف بدولة اسرائيل و ماعنديش مانع يفضل اسمها اسرائيل وايه يعني علي الأقل ده اسم نبي نؤمن بيه ثم ماهو احنا مش معترضين علي اسم الدوله السعودية نسبة الي سعود و ده لا نبي و لا ولي
وكمان ها اعترف ان القدس عاصمة لهذه الدولة و هاعتبرها دولة شقيقة يعني جت عليها مانا عندي شقيقات كتير
طيب بالمقابل علي هذه الدولة ان تعترف ان مواطنيها من عرب و يهود و اي ملة مواطنين لهم نفس الحقوق وعليها ان تسمح للفلسطينين اللاجئين بالعودة الي وطنهم بل علاوة علي ذلك عليها ان تسمح لأي مواطن من العالم مسلم مسيحي يهودي بوذي من غير ملة ان يهاجر الي اراضيها كما تفعل امريكا ولية امرها
وان تسمح بانتخابات حرة قد يصل فيها الي الحكم عزمي بشارة او خالد مشعل او اي شخص برضه اسوة بامريكا التي تولي الرئاسة واحد من اصول افريقية ابوه مازال يحمل جنسية كينيا
يعني حتي مش جده كونتا كنتي اللي اتخطف من قرن من الزمان
البند التاني من المعاهدة اني علي استعداد للتعامل كمواطن مصري مع اي مواطن من هذه الدولة كمعاملتي مع اي عربي شقيق
مقابل ان تقوم هذه الدولة بتفكيك سلاحها النووي اللي هايبقي مالوش لازمة بعد اتفاقنا علي هذه المعاهدة
اخر بند ان عم اوباما يراقب تنفيذ هذه الشروط و يضمنها وطبعا هو مش ها يمانع لانه بكده هايريح دماغه من ناحيتي
طيب اذا لم تقبل اسرائيل شروطي
فاني اتعهد ان اظل في حالة عداء و سوف اورث هذا العداء لأبنائي و احفادي حتي يقضي الله امرا كان مفعولا ويعود الحق لأصحابه
والسلام لمن قبل السلام
سلام عليكم

هناك 7 تعليقات:

محمود خاطر يقول...

وانا كمان أضم صوتي لصوتك وهوقع معاك

tarek momen يقول...

ماشي يا استاذ محمود
بس ابقي هات معاك قلم رينولدز
ماضمنش يلطشوه بعد التوقيع
تحياتي

Foxology يقول...

يا استاذنا الجميل

وهل اليهود هيوافقو على الشروط دى ؟؟ لا اعتقد الحقيقة والدليل على كلامى تصريحات رئيس الوزراء بأن اسرائيل لا تمانع فى قيام دولة فلسطينية ولكن "منزوعة السلاح" يعنى من الآخر دولة مدنية تماما وهما اللى معاهم كل الأسلحة وبس:)

تحياتى :)

صيدلانيه طالعه نازله يقول...

احلاااااااااااااااااام

اسرائيل لو العرب وافقوا على التحشيش اللى قالوا نتنياهو امبارح فى خطابه
اسرائيل نفسها حتعترض لانها مش عايزه شالوم من اصله هيا عايزه تبقى شوكه فى زورنا و بس

tarek momen يقول...

الصديق فوكس الحكيم
اعتقد ان خطاب النتن ياهو يعتبر رد بالرفض علي مبادرتي
ولذلك فاني اعلن سحب المبادرة واستمرار حالة العداء بيني و بين هذا الكيان الصهيوني
اصلهم جزم
مالهمش في الطيب
بس خد بالك هما اللي بيضيعوا الفرصة
تحياتي

tarek momen يقول...

الصديقة صيدلانية
حيرتيني معاكي
انتي طالعة و لا نازلة
شرفتيني بالزيارة
عندك حق في اللي ذكرتيه
امال تبقي اسرائيل ازاي
الا اذا فضلت شوكة في زورنا
بالمناسبة الاقيش عندك شريط تاميفلو بتاع الأنفلونزا اياها
تحياتي

شمس النهار يقول...

كده علي ماجيت سحبت المبادره
طيب حصل خير