الاثنين، 3 نوفمبر، 2008

نهي

تابعت موضوع نهي رشدي من خلال المدونات فقد اعتزلت قراءة الجرائد الا في حالة كانت مفروشة تحت الطعام مع الزملاء بالعمل
ومن خلال التعليقات وجدت ان الغالبية متضامنين مع تصرفها الشجاع و تمسكها بحقها مع اعتبار انها بنت وهذا في عرفنا مرادف للضعف و الأستكانة
وتحمل المعاملة السيئة بدءا من اب يفضل عليها اخوها..الي اخ يجرب سلطاته المستقبلية..الي زوج يتحكم فيها
طبعا هذه صورة عمومية وليست قاعدة
وفي بلد مثل بلدنا يتحمل فيه الجميع بلا استثناء جبال من الظلم ذكورا و اناثا ..شبابا و شيوخا
يكون موقف نهي كسرا للقاعدة مما يثير ضدها الظالمين لجرأتها في رفض الواقع و اصرارها علي المطالبة بحقها في العدالة
كما يثير ضدها بعض المظلومين لاعتبارهم ان جراتها هذه تكشف ضعفهم و استكانتهم
وهكذا قرات عن اتهامها بانها اسرائيلية؟؟؟؟؟؟؟؟
وبصرف النظر عن حقيقة جنسيتها فهذا لا يغير من الأمر شئ علي الأطلاق
فان ما اثارني بشدة انه اعتبر الفلسطينيين الذين تمسكوا بارضهم و منازلهم في نكبة 48 وبالتالي عاشوا تحت حكم الأحتلال
اصبحوا سبة وتهمة و اقل شانا ممن ترك ارضه و فر باولاده خوفا من القتل في مذابح دير ياسين و امثالها
فرجاء لا تصدقوا انهم اسرائيليين و لا عرب 48
انهم فلسطينيين و اصحاب الأرض و المتمسكين بها حتي الموت
وندعو الله ألآ ياتي علينا يوم نصبح فيه نحن ايضا عرب 81 او مصرييين 81 الذين رفضنا ان نترك بلدنا و نركب البحر الي اوروبا هربا من احتلال الحزب الوطنه
والهاء في كلمة الوطنه ضمير غائب تعود علي صاحب الحزب

هناك 14 تعليقًا:

موناليزا يقول...

اللى مش قادرة افهمه بجد مادخل جنسيتها باللى حصللها اليست انسانة ولها حقوق آدمية

Che_wildwing يقول...

محاولة لاضفاء صفة الوطنية على مرتكب الفعل
ليتحول الامر من تحرش جنسي إلى تحرش وطني
فهي اسرائيلية ومافعله بها ليس بالأمر الكافي

~*§¦§ Appy §¦§*~ يقول...

بجد تسلم ايديك يا استاذنا
انت قولت الملخص والمحاميه الكدابه اتبطت وسكتت والله قولت كده من الاول
بجد بوكيه ورد كبير ليك على الكلمتين دول

Foxology يقول...

استاذ طارق انت قلت الخلاصة بجد

شمس النهار يقول...

لافضه فوك ياعم طارق
اهو كده بالظبط
الناس مش واخده بالها ان عرب 48اصلا دول شوكه في حلق المجتمع اليهودي الاسرائيلي
وهمه دول اللي احفدهم هيفتحوا الجبه الداخليه للعرب المسلمين عند الفتح ان شاء الله
كل سنه وانت طيب
عيد الحب وشهر عيد م

tarek momen يقول...

الأبنة موناليزا
بصراحة و لا انا قادر افهم زيك بالضبط
شرفتيني بالزيارة

الأخ تشي
علي كده سيتم تجنيد الشباب مستقبلا في سلاح المتحرشين بالأسرائيليات
علي كده تامر حسني غلطان لما تهرب من التجنيد

العزيزة بنت الشمس ابي هانم
اخجلتم تواضعنا ده من ذوقك
اخبار ابو الهول ايه
بتاخدو و تدوا مع بعض في الكلام و لا لسه قاعد ساكت

فوكس الحكيم
اشكرك
ودايما منور المدونة

الصديقة شمس النهار
مدفية المدونة خاصة مع بداية الشتاء
وجهة نظر جديرة بالأحترام في موضوع فلسطينيين 48
ربنا يحقق رؤيتك ان شاء الله
وكل سنة و انتي طيبة

SemSem يقول...

هو الاعتراض مش انها اسرائيلية
بس اللى عرفته انها اتهمت قبل كده ضابط شرطة فرنسى على مااعتقد واخدت منه تعويض
بمعنى ان الموضوع دا حصل قبل كده
ودا دخل الشك جوه الناس
بان اشمعنى بيحصل معاها هى بس وبما انها اسرائيلية كما اشيع يبقى اكيد بتلفق الجريمة يعنى التحرش محصلش
دا رأى الشارع

tarek momen يقول...

الصديق سمسم
وليكن انه تم التحرش بها من قبل
هل هذا مبرر ان تسكت اذا تم التحرش بها مرة اخري
وهل يجوز ان تصدق انها تكسب رزقها من رفع قضايا التعويض بسبب التحرش
اظن انه غير معقول

سبهللة يقول...

كله كوم واخر سطرين فى البوست كوم تانى

fashkool يقول...

أستاذ طارق \ تحياتى .. اخيرا لقيت حد قريب منى اتكلم معاه .. يا أخى نهى رشدى فلسطينيه من عرب 48 زى ما بيقولوا .. والجواز اسرائيلى .. امال تروح فين .. تنط فى البحر ولا تركب طياره وتطلع تطلع فى السما وبعددين تنط فى الفضاء .. وبفرض انها اسرائيليه .. والله الاسرائيليين احسن مننا بس اللى بينا وبينهم فلسطين لو يسيبوا فلسطين فى حالها ويحلوا مشاكلها معاهم .. مش حيبقى فيه مشكله معاهم.. طب احنا نعرف نعمل زى الاسرائيليين .. احنا نعرف نغير رئيس كل ما احنا عايزين .. يخرب بيت اليهود ويروحوا فى ستين داهيه .. بس ايه رأيك فينا احنا.. احنا ما سويناش حتى الأوباش .. ولا حتى بلاد واق الواق.. احنا خارج التاريخ .. واخيرا تصرفاتنا بقت خارج التاريخ.. تحياتى

~*§¦§ Appy §¦§*~ يقول...

قاعد ساكت ومأموص مش راضى يكلمنى عملتوا فيه ايه يا ولاد الفراعنه زعلتوا الراجل ليه

اقصوصه يقول...

معاك حق

مش كفايه الظلم كله اللي يتعرضون له الفلسطينين

احنا بعد نكمل عليهم بنظرتنا السطحيه عنهم

المشكله ان احنا دايما متسرعين

ونكون فكره سريعه بدون ان نتاكد او ندقق بالمعلومات

هذا عيب شعوبنا للاسف

واحد من العمال يقول...

أحييك على مدونتك المميزه
التى سعدت بزيارتها
ولنهى رشدى التحيه لموقفها
الذى كسر الخوف
وعرب 48 أبطال فعلا لصمودهم ولتحملهم وضع المواطن من الدرجه الثانيه
وربما الثالثه
وهم أفضل ممن تركوا بلادهم تحت وطأه الأحتلال وفظائعه مضطرين

وتقبل تحياتى ومرورى

بس خلاص ... يقول...

استاذ طارق
السلام عليكم مدونتك جريئة ورائعة سعدت جدا بمرورى واستفدت الكثير منها
لك كل التحية