شاهدت بالأمس في نشرة اخبار التاسعة
خبرا يدخل في باب العجائب و الغرائب
ملخص الخبر ان امريكا قررت اجراء تصويت الكتروني للأطفال لأنتخاب الرئيس الأمريكي القادم
طبعا هذه الأنتخابات غير محتسبة و لكن اظن انها لتعويد الأطفال علي ممارسة الحق الأنتخابي حتي مستوي الرئاسة
وليس لريادة الفصل الدراسي
مما يجبرني علي الشعور بالأحترام لهذا الشعب
طبعا مع اعتراضي علي تصرفات اخري كثيرة للشعب الأمريكي
المهم ان هذا كله ليس فيه غرابة
الغريب ان يذاع هذا الخبر في تليفزيون الدولة الذي يقنعنا نهارا و ليلا ان الرئيس هو بابا و حرمه هي ماما واحنا الأولاد الصغيرين اللي ما بنسمعش الكلام
وانه لايجوز الأجتراء علي مقام الرئاسة حتي لو بالسؤال عن الصحة
فعلا عجيبة
الحضرة البهية لبنات مدرسة السنية
قبل عام واحد
هناك 23 تعليقًا:
والله عندك
اصل بلدنا دى بلد العجايب والمتناقضات
زى ما بيطبقوا الديموقراطية
الديموقراطية المصرية انك تقول رأيك زى ما انت عايز وهم يعملوا اللى هم عايزينه
ربنا يلطف بينا
سواء وافقنا على المجتمعات الغربيه او انتقدناها .
هذا لا يمنع انها كمجتمعات مدنيه هى أفضل منا بكثير
(كثير هذا فرق 1 : 1000000000)
تعويد الاطفال على الديمقراطيه وحريه الاختيار شئ بديع طبعا
بس انا شايفه تلميح منك اننا مش عايشين فى ديمقراطيه زيها
او انك لا سمح الله بتعترض على ان أل مبارك هما بابا وماما واخويا الكبير
وهذا شئ يخالف الشريعه الفرعونيه التى لازلنا ندين بها حتى الان وهى ان الحكام هم فراعنه لا يموتون ويظلون يحكمونا من القبور كالالهه
يا استاذ طارق احنا بلد المتناقضات على سبيل المثال لا الحصر كل وسائل الأعلام الرسمية .. قنوات تلفزيونية وصحف قومية .. تلاقى الخبر وعكسه مثلا من كام يوم خبر فى الأخبار او الجمهورية مش فاكر عن تبرع مصر بمليون دولار لقرى سودانية محرومة من المياة وفى نفس الصحيفة استغاثة من اهالى صفط اللبن بسبب انقطاع المياه من شهرين دون مجيب!
عجبى عليكى يا مصر
تحياتى :)
عزيزي عابر سبيل
بجد موضوعاتك اكثر من رائعة انا شفتها بجد فيها افكار ووجهة نظر قيمة
خاصة الموضوع ده
هناك في العالم الاخر رغم رفضنا لبعض سياستهم بنتمني في اوقات ان بلدنا تتعدي منهم
وربنا يخلي لينا بابا حسني وماما سوزان
وعمو جمال بالمرة
هههههههههههههههههه
علي فكرة في موضوع اقتصاد انت طلبت حد يشرح الازمة المالية العالمية بس لن تقبل وجهة نظر حد اقل من ماجستير
انا قدمت بالفعل تفسير وتحليل للازمة
في مدونتي
انسان عاشق حر
في اخر بوست فيها
بس انا مش معايا ماجستير
بس انا حاليا طالب في ال
CMA شهادة المحاسبة من المعهد الامريكي للمحاسبة
وبشتغل محاسب في بنك استثماري
اتمني تقبل تقرء تحليلي
تحياتي
تامر الحسيني
انسان عاشق حر
للتربية الأسرية دور كبير في تشكيل شخصية الطفل الديمقراطية .
أما عن أمريكا فهي دولة مؤسسات والحرية المتاح لشعبهافقط لا غبار عليها وهو ما نفتقده في عالمنا العربي ونتمنى أن يترك المجال للعقلاء من أمتنا من إبداء آرائهم التي تذكي عقول شعوبنا .
أشكرك أستاذي الكريم على طرح هذا الموضوع
والله شىء عجيب ..بس منطقى جداااااا
لو انت عايز تعلم طفل انه ليه رأى وعايز يكونله شخصية هتعوده يقول رأيه
المسألة مش انتخابات بس دول بيجهزوا كل طفل علشان يكون اللى هو عايزه حتى لو رئيس البلد كلها
له رأى
عنده طموح
فيه تكافؤ فرص
والاحلام ممكنه
اما عندنا فلا شىء غير القهر المنظم للصغار حتى يعتادوا الامر ولما يكبروا يكونوا شعب يحكمه الحاكم بامره
اول مرة وياريت تقبلنى ابنه
جزاك الله خيرا ابى الكريم
تحياتى
ياه يا استاذ طارق
ديمقراطيه انا سمعت الكلمه دى فين فين فين
مش فكره
يا عم طارق احنا مجبرين على الهوا اللى بنتنفسه على اساس انه ملوث ومفيش غيره
يعنى احنا بنعيش بيئه كلها فساد
صلى على النبى كدا
وسيبك منهم ربنا يفقعهم زى ما فقعونا
ولاد المفقوعه
:)
لا تعليق بعدك يا أستاذ طارق
تسلم دماغك دي بجد
انت ماسمعتش رئيس الوزراء وهو بيقول ان احنا لسه بيبي مانعرفش في السياسه والديموقراطيه
ماالانتخابات عندنا برضه كده
لبيبهات الشعب
يعني انت وانا وكل المصريين بنتعامل معاملة الاطفال بيمرنونا علي الانتخابات
عشان لما نكبر نعرف ننتخب
طيب يا ترى
فالبلدان العربيه
متى سيتم السماح للكبار بالانتخاب؟
اخى tarek momen
السلام عليكم
بالصدفة اسعدنى الحظ بالدخول الى مدونتك فقرات منرمضانيات 5 وانتهيت عند اخر تدوين فى 20أكتوبر، 2008عجيبة
احسنت واسمح بتقديم تعليق واستفسار
التعليق يخص الازمة المالية لاميريكا
• فى اواخر الستينات تزوجت واقمت بحائق القبة ، وكنت اصلى الجمعة خلف الشيخ كشك رحمة الله عليه ، وكانت هناك ازمة مالية فى امريكا برضه ولكن تخص السيد نيكسون ، ومن فوق المنبر قال المرحوم بكل حسرة ان عمدة من الصعيد تبرع بثمن محصول القطن ملكة لسداد ديون نيكسون ، وارجو ان لاتسخر منى ، لما لاتكون هذه الازمة مفتعلة لتقوم القيادات فى بلاد المواشى بالتخلى عن الارصدة حق مواطنيها لانقاذ البغل من كبوته
• والسؤال بصفتك متابع للتلفزيون ، هل رايت جمال مبارك يوزع عقود تمليك شقق ؟ وهل لهذا حق فيما قام به ؟ ومارايك فى هذه الدعاية الفجة والبلطجة الاعلامية
• اطلت عليك فسامحنى ، وتقبل تحياتى .......بيرم المصري
تصور يا استاذي الفاضل انهم كمان ما عادوش بينتخبوا فى الفصول
يعنى على ما اذكر ان ايام ماا نا كنت فىالمدرسه كنا بنعمل الانتخابات دي ووالله كانت حلوه فعلاااااا
وكان فعلا فحرتنا انها معبره عن راينا رغم حداثة السن يعنى كنت حوالي 9 سنين
صحيح كنت انا الرائده بس العيال كانوا بيسمعوا كلامي عشان فعلا اختاروني
اما عن الشعب الامريكى فمؤكد هما ناجحين فى اوجه معينه مش من فراغ
واما لماما وبابا الشعب ربنا يسسهل اعتقد هانت
تحياتي لحضرتك
وحشرتك شرفتني بالزياره
عادي يا سيدي العملية ماشية وما في غير الوقت سواء ليك او لاحفادك :)
استاذ/ طارق
لا تتعجب من اذاعة الخبر فالنظام يعلم تماما ان الشعب كالعجينه في يديه يشكله كيف يشاء.
اتشرف بزيارتك لمدونتي لتتعرف علي كثير من ملامح الشعب المصري
(( من صلى اثنتي عشرة ركعة في يوم وليلة بُني له بهن بيت في الجنة )) [ مسلم ]
تعالى شوف الريس بيئول ايه على شعبه الغلبان المطحون
على هذا الرابط
http://watan2020.blogspot.com/2008/07/blog-post_20.html
السلام عليكم ورحمه الله وبركاته
لا جدال سيدى الفاضل بأن ديمقراطيتنا متخلفه عن ديمقراطيه أمريكا أسلوبا وممارسه لكنى أتسائل لماذا لم يمنع هذا التقدم فى ممارساتهم الديمقراطيه من وقوعهم فى عدد من الأخطاء (حربهم فى العراق - وأفغانستان - ودعمهم لأسرائيل- المشكله الماليه الأمريكيه فى الأصل )اذن ديمقراطيتهم بالنسبه لى محل شك ومثلها مثل مسرحياتنا الديمقراطيه
وتقبل تحياتى ورأيى ومرورى
ههههههههههههه
سمعت حوار مرة فى فيلم ليله البيبى دول بين جميل راتب ومحمود عبد العزيز بيقوله محمود انتم اللى اخترتوا بوش وكونداليزا ومش عارفه مين
قالوه وانتم حكمكوا مين اللى اختاروهم
جميل راتب كان قايم بدور ظابط امريكانى فى المارينز
هذا وبالله التوفيق انا عن نفسى معرفتش ارد ههههههههههههههه
تحية لكل من شرفني بالتعليق
الأخت الفاضلة حافظة القران باذن الله سبهللة
الحمدلله انهم علي الأقل سايبينا نقول اللي احنا عايزينه
كناري
ياسيدي ده مش تلميح ده تصريح واذا كنا لسه في الحقبة الفرعونية ما تيجي نبني له هرم صغير ويبقي عندنا خوفو و خفرع و منقرع و منظلم
فوكس الحكيم
كيف احوالك و غايب ليه
تقريبا صفط اللبن بقت تبع محافظة ام درمان في تقسيم المحافظات الجديد
تامر الحسيني
اشكرك علي المجاملة اللطيفة
محمد الكمالي
هلا بالأخ من الأمارات
معك في التمني ان يترك المجال للعقلاء و لكن احيانا ما كل المطالب بالتمني ولكن تؤخذ الدنيا غلابا
الأبنة الكريمة جنة
دعاء الي الله ان يجعل لمك من اسمك نصيب
دورنا كأباء ان نقوم نحن بتعويد ابناءنا علي الديموقراطية وعلي المطالبة بحقوقهم لننشئ جيلا من الأحرار
الصديقة اللدودة همس
يابنتي خفي من الفرسة اللي عايشاها دي
صدقيني انا فعلا قلقان عليكي لا يحصل لك حاجة
زميلة العلوم هبة النيل
نورتيني
ابقي افتحي المدونة و نفضي التراب
واحشنا تشعارك الجميلة
الصديقة شمس النهار
يعني في السن ده و بيعتبرونا اطفال ربنا يجبر خاطرهم
اقصوصة
يمكن يسمحوا لما نرجع اطفال تاني
بيرم المصري
شرفتني بالزيارة و اشكر لك مجاملتك الرقيقة
صبرني يارب
ربنا يصبرك
الخوف انهم يكوموا الغوا انتخابات ريادة الفصول علشان تبقي بالتوريث
يعني الألفة في 3/اول يجوز و يخلف ولد يبقي رائد للفصل من بعده!!!!!
مشاري
اهلين بالأخ من الكويت
شرفتني بالزيارة
مش فاهم يعني ايهمافي غير الوقت لي و لأحفادي
يعني حاجة كويسة وال وحشة
م/ الحسيني
شرفتني
اختلف معك ان الشعب كالعجينة
قد ينطبق هذا علي بعض الناس و ليس كل الناس
ابو بدر الدين
قصيدة جميلة
تحياتي
واحد من العمال
اعتقد ان العيب ليس في الديموقراطية و انما في التطبيق
والموضوع بحاجة لبوست متكامل عن الديموقراطية
شرفتني بالزيارة
ايه ده
يا نهار ابيض
فخامة صاحبة السعادة حاكمة كوكب الفيكونات ااابي هانم
يادي النور
بصراحة لم اشاهد الفيلم ولذا مش فاهم هما بيتكلموا عن ايه لكن تقريبا كانوا بيقولوا لبعض لا تعايرني و لا اعايرك عندنا بوش وعندكم مبارك
والله اعلم
إرسال تعليق