الأحد، 27 يوليو 2008

سخافة

احب اعتذر مقدما لزائري المدونة عن سخافة الموضوع
كنت قد شاهدت احدي حلقات الماسوف علي شبابها المذيعة الألمعية الدكتورة هالة سرحان وكانت تستضيف الممثل العتويل عادل امام الشهير بالزعيم
وقد قال سيادته ردا علي احد اسئلتها
شوفي افلامي يا هالة و انتي تقرأي تاريخ مصر
قلت في عقل بالي يمكن حتة نرجسية زيادة و يراجع نفسه
من يومين شفت برنامج تاني علي احد القنوات المحلية من النوع اللي بيقدمه اتنين مذيعات مجهولي الأسماء
واتصلوا تليفونيا بالزعيم يسالوه عن رايه في الفنان سعيد صالح
فاجاب لا فض فوه
شوفوا افلامي مع سعيد تعرفوا تاريخ مصر
هو ايه الموضوع
مصيبة لتكون وزارة التربية و التعليم تنوي تدريس تاريخ عادل امام المعروف بتاريخ مصر سابقا
يانهار اسود هي مصر وصلت لهذه الدرجة من الهوان!!!!!!

هناك 8 تعليقات:

باسم يقول...


السلام عليكم و رحمة الله و بركاته
هل تصدقنى اذا قلت لك انه لم يكذب فى ادعائه لكنه ادعاء منقوص
لكل شئ تاريخ الخير و الشر
النور و الظلام

اما تاريخ الزعيم المفوه فهو تاريخ ملئ بالاسفاف و الابتذال و السطحية
ام ترانا نسينا مدرسة المشاعبين
وهو ما قامت فعلا وزارة التعليم بترسيخ ما كان فيها من مثل و قيم بكل قوة و النتيحة ما وصلنا له الان

Foxology يقول...

يا استاذ طارق الراجل بيتكلم صح

لو شفنا افلامه هنشوف تاريخ مصر الأسود

بدأ هو مع الفنانين الكبار ايام الفن النضيف الجميل مع احمد مظهر ورشدى اباظة وغيرهم وغيرهم ايام الأبيض واسود غير طبعا ثلاثى اضواء المسرح وقتها كنا كلنا كعيلة نقعد نتفرج على الفيلم ونضحك بجد من قلوبنا حاجات بتتقدم صح وبتعبر عن الزمن ايامها بشكل واقعى

مع مرور الزمن ومع تنصيبه الزعيم ومعرفش مين اللى اداله اللقب ده هنلاقى افلامه كلها بتعبر عن الواقع المصرى

افلامه من سئ الى اسوأ وكذلك التاريخ المصرى من سئ الى اسوأ ولسه دم ضحايا العبارة مبردش

وبس

Che_wildwing يقول...

بعد كده يقول
شوفوا برامجي وانتوا تعرفوا تاريخ مصر

زهرة الجنة يقول...

استاذ طارق

الهوان مش بسببه هو
الهوان السبب فيه اللي بيستضفوه وبيخلوه مثل وقدوة للشباب المغيب

هو بيقول تاريخ مصر في افلامه بس أكيد تاريخ مصر مش مبتذل ورخيص للدرجة دي

يمكن يكون فعلا هو ليه تاريخ بس تاريخ أسود وملئ بالشر والابتذال

ولكن للاسف العيب في اللي خلوه زعيم!!

تحياتي لحضرتك

عاشقة القمر يقول...

سلام عليكم عاشقة القر من السودان بعكس تاريخ مصر مليانه شي حلو زي الثور بس سبحانه الله كل شي تغير الان الان هو تمثيل شكلوا اهكون تاريخ وماتسبعد ممكن نزل مقرر لي طالب انتم تمثيل احنا الغناء ربنا يهديهم بس عادل امام تاريخو اسود

هبة النيـــــل يقول...

أستاذ طارق

لافض فوك انت

سبهللة يقول...

يانهار اسود هي مصر وصلت لهذه الدرجة من الهوان!!!!!!
اه وصلت لهذه الدرجة واكتر شوية
بص انا اعرف موقف شخصى لعادل امام بيقول انه مغرور جدا
عادل امام عنده شقة فى الدقى فى عمارة مشهورة اوى وبتطل على نادى الصيد
وطبعا لما اتغنى وراح القصر بتاعه فى المنصورية ساب الشقة
فأولاد الحلال قالوله لأ كدة غلط دة الجن ممكن يسكنها
حاول تأجر الشقة واهى فى المكان المميز دة هايكون ايجارها عالى
وبمحض الصدفة صديقة ليا متزوجة واحد امريكانى مسلم وبيشتغل فى السفارة الامريكية
واختاروا الشقة دى عشان يسكونوا فيها فعادل امام بعت لهم المحامى بتاعه عشان يمضى معاهم العقد بحجة انه عادل امام وانه ما ينفعش يروح بنفسه يمضى على العقد
طبعا الراجل الامريكانى خادته العنجهية هو كمان وقال اذا كان هو عادل امام فأنا امريكى الجنسية
وفعلا راح عادل امام وقابل صديقتى وزوجها والمفروض ان الشقة كانت هتتأجر ب 3300 دولار فى الشهر
وقالهم انتوا ليكو الشرف انكم بتسكنوا فى شقة عادل امام وتنامو على السرير اللى نام عليه عادل امام
وكان مُصِر انه ما ينزلش مليم من الايجار
لكن صديقتى قالت له بما انك عادل امام بجلالة قدره فبالتالى مش هايفرق معاك ال 300 دولار اللى انا عاوزة انزلهم من قيمة الايجار
وفعلا نزلهم 300 دولار خوفا على اسمه لما تحكى للناس اللى تعرفهم ان عادل امام مهتم اوى ب 300 دولار
هو قالها كدة
وكان فى القعدة دى قمة فى السماجة والغرور
ثم اصلا مين عادل امام اللى بيأرخ لتاريخنا
حتة واحد مضحكاتى ليس اكتر
دة غير ان كل افلامه بتنجح بسبب المناظر اللى فيها
المناظر الاباحية والحبشتكانات والذى منه
معلش يا استاذ طارق
طولت عليك بس انا من متغاظة منه من فتره وانت جيت عالجرح

شمس النهار يقول...

انا مش عارفه ليه كل هذه العصبيه علي عدوله مش دي بلادهم ياجماعه يكتبوا تاريخهم زي ماهمه عيزين مش احنا اللي بندخل افلامهم ومسرحيتهم ونكبرهم ونسمنهم عشان يكبرواو يحرقوا دمنا يعني نجيب لهم حد تاني يحرقوا دمه احنا اولي