الثلاثاء، 22 يوليو، 2008

سؤال

يعني ايه كلمة وطن ؟؟؟

الخميس 24/7/2008

تحديث
عندما خلق الله سبحانه و تعالي سيدنا ادم خلقه من طين ثم نفخ فيه من روحه واسكنه الجنة ثم عندما اكل من الشجرة انزله الي الأرض برفقة أمنا حواء
سؤال اخر
هل كان سيدنا ادم يعتبر وطنه الجنة ام الأرض واذا كانت الأرض فهل حيث نزل ام كل الأرض ؟؟؟
رجاء الألتزام بترتيب الأسئلة

هناك 13 تعليقًا:

همس يقول...

ايه الهنا دا اول تعليق


بس قلى ايه السؤال اللى مش جى على بالى خالص دا

دا امتحان ولا ايه بظبط؟؟؟

وبعدين انت ما حددت الوطن معنى الوطن فى الخيال ولا الواقع

معناه تمنى ولا معناه حياه عيشينها


ابقى حدد يا استاذ طارق

بلاش التوهه اللى احنا فيها اصلا


سلاموعليكو

tarek momen يقول...

العزيزة همس
انا نفسي مش عارف احدد المعني المطلوب
قلت اسمع منكم انتم الشباب معني الكلمة عندكم يمكن استفيد
بالنسبة لي و من غير شعارات
الوطن هو اهلي و ناسي
اخواتي و اقاربي و كل من يمت لي بصلة قرابة
اصدقائي و زمايلي في العمل
اصدقائي المدونين اللي بيشاركوني افكاري و ارائي
يعني لو كل اللي ذكرتهم دول راحوا عاشوا في موزمبيق
تبقي موزمبيق هي امي ونيلها هو دمي
دي رؤيه ملخصة ولما اسمع اراءكم يمكن تيجي لي افكار اخري
شرفتيني بالتعليق
تحياتي

Do not Press F1 يقول...

السلام عليكم
يعنى ايه كلمة وطن مش كنت تغششنا اى حاجه عن السؤال دا اصله سؤال خارج المنهج.

بص المفروض انك طرحت السؤال ومطلوب من كل حد يجى يدى كومنت يقول يعنى ايه كلمة وطن بالنسبة ليه بصراحة دا سؤال صعب حبة حبتين تلات حبات.
هل الوطن هو المكان اللى بيتولد فيه الانسان ولا الوطن هو المكان اللى بيعيش فيه الانسان ولا الوطن هو المكان اللى بيستريح فيه الانسان؟؟؟؟
بالنسبة ليا انا بقى يعنى ايه كلمة وطن ؟؟
الوطن
هو المكان اللى اهلى وحبايبى عايشين فيه.
الوطن
هو المكان اللى احس فيه براحة نفسية .
الوطن
هو المكان اللى لما ببعد عنه بيوحشنى. الوطن
هو المكان اللى لو حصلت فيه اى حاجه وحشة تقتلنى .
الوطن
هوالمكان اللى اتمنى يوم ما اموت ادفن فيه.


سلاموووز

Foxology يقول...

وطن ...

و = وباء وامراض ملهاش علاج بنستوردها فى مبيدات علشان ناكل حاجات بايظة تبوظنا من جوة

ط = طريق مسدود ادام اى حد بيحاول يصلح

ن = نور بعيد اوى عن عنينا مش شايفينه حتى ولا شايفين اثره علشان نخرج من الضلمة اللى احنا فيها

وبس :)

tarek momen يقول...

صديقي فوكس الحكيم
لست معك في هذه النظرة السوداوية لمعني كلمة وطن
يمكن انت حصرت المعني لمصر الحالية تحت الحكم الفاشي
لكن انا سؤالي شبه فلسفي
معلهش حاول تعطيني تعريف اوسع للكلمة
يعني علشان اوضح هل لو وجدت بلد بلا اوبئة.. وطرق الأصلاح بها متوفرة.. والنور امام الجميع هل لديك استعداد ان تعتبرها وطنك الحقيقي و تهاجر اليها
جاوب يا بطل

سبهللة يقول...

بص انا بصراحة معرفتش اجاوب فسئلت جوزى
قالى
وطن يعنى زكرياتنا الجميلة وحان صغيرين
يعنى اهلنا واصحابنا وحاجات كتير اوى يا رانيا
بس ما يحسش بالوطن دة غير اللى اتغرب زيي وبعد عن ناسه وارضه وميته وهواه

بصراحة يا استاذ طارق لو كنت سبته شوية يسترسل فى كلامه كان قال شعر عن مصر
بس تعرف
اكتشفت بعد كلامه
ان وطن
يعنى حب
انا بالنسبة لى وطنى هو حبى لارضه وشمسه وهواه ونيله وناسه
بصراحة لو قلت احلى حاجة فى وطنة بحبها
مدرستى فى المرحلة الابتدائية
يمكن هى دى اللى خليتنى احب وطنى كنا كل يوم لازم نحترم العلم ونحيي العلم
ونقول تحيا جمهورية مصر العربية
يااااااااااااه يا استاذ طارق
مااحلى الرجوع الى الوطن بعد الفراق
ماأحلاك يا وطنى
========
معلش اعذرنى انا مش هاعرف اجاوب على سؤال سيدنا ادم
اصلنا ما اخدناهوش فى المدرسة
=====
تحياتى ليك
وياريت ما تغيبش عننا تانى

باسم يقول...


السلام عليكم و رحمة الله و بركاته
من جميل نعم الله علينا ان يرزقنا صفاء نرى به ما بدواخلنا بوضوح
فكم منا يحيا و قد يموت دون ان يرى حقيقته
دون ان يدرك من هو و لما خلقه الله
دون ان يدرك ماذا يحب و لما يحب و كيف يحب و الى متى سيظل يحب

هل الوطن يحيا بداخلنا لاننا نبتات خرجت من رحمه و ارتوت من دماء شرايينه حتى و ان كانت هذه الشرايين قد لوثتها ايدى و قد تكون ايدينا من هذه الايدى حين حتى لم تمتد باشارة الاعتراض حتى على ما يجرى له و لنا
فان حبه لم يتلوث بسببه هو
بل نحن من لوثناه و شاركنا سواء بقصد او بدون قصد
حين اتقاعص متحججا عن القيام بدورى ايا كان هذا الدور صغر كبر اتحجج بفساد من فسد و اكتأب بموت من دهسته اظلاف ديناصورات هذا الزمان دون رحمة
او حين اتشبث بشماعة انى ماذا استطيع ان اغير و انا لا شئ فى خضم امواج هذا الطوفان الهادر
حين اسمح لهم ايا كان هؤلاء ان ينزعوا الحب من قلبى
او حين يثمنونه بمكايليهم فيدسون فى قلبى و عقلى انى لا ازن شئ و انه لا قيمة لى و ان وجودى مثل عدمى
حين ينسبونه الى اسمائهم و كأنه من املاكهم و انسى و ينسون اننا جميعا نتسمى باسمه فليس هو حكر او ملك لاحد دون احد و انه هو نحن و نحن هو

كثيرون هم من تم ظلمهم و قيل لهم ان وطنكم هو من ظلمكم
قد يكونون من الكثرة بحيث لا نستطيع حتى ان نحصيهم
كثيرون من تم تعريتهم حتى من ابسط ما يورايهم و يسترهم من ان تغتصبهم الاعين و تلوكهم الالسن و حرموا حتى من مصمصة الشفاه عليهم
كثيرون و كثيرون و كثيرون
و قيل لهم ان الوطن هو من فعل بكم هذا دون ان يطرف له جفن او يختلج لديه قلب
هل انا احبه فعلا لا قولا ?
هل احبه ؟
كيف احبه ؟
و هل انتظر مقابلا لهذا الحب ؟
هل حبى له يفيده ام يضره ؟
يجمله ام يلوثه ؟
هل قطعت الحبل السرى الذى يربط قلبى بقلبه فصارت نبضات قلبى لا تعرف طريقها و تخفت و تخفت و تخفت
فاختفى معها قلبى من الوجود
و تلاشت معه ابتسامة روحى و علاها الوجوم
حتى صرت اتحاشى النظر فى وجوه من حولى
هل هو الوجوم و الحزن ام التبلد و القسوة !؟!؟!؟

لما صرت استكثر ان اروى عطشه ببعض عرقى او ببعض قطرات دمى متعللا انها لن تسعفه و لن تغسل الحزن عن وجهه و ما ادرانى ؟
لما حتى صرت ابخل عليه حتى بكلمة حب صادق تنبع من قلب لا تنبع من طى لسان تعلم الكذب و الزيف و الخديعة بحجة ان هذه هى لغة هذا الزمان
لما صرت اضن عليه بابتسامة امل او حتى حزن على ما وصلنا اليه
لما و لما و لما
لما لا يتحول هذا الحب الى حياة الى جهد الى بذل مهما قل او صغر الا يكفينى انه حياة لمن ادعى حبه
الوطن هم اهلى و ناسى
هم من اكثر من نصفهم تحت خط الفقر
هو من تركت خيره يذهب لغير اهله دون ادنى اعتراض
هم من صرت ابخل عليهم حتى بكلمة شفقة او نظرة
هو الذى انا جزء من ترابه اليوم امشى عليه و غدا ساعود الى رحمه مرة اخرى
هو الذى اراه جميلا مهما شوهوه و ادموه
هو الذى انا جزء من دثاره و حين ادير ظهرى اليه و اتركه فانا من اعريه لا هم
هو الهواء الذى اتنفسه حتى و ان كان ملوثا
هم المرضى الذين يموتون لا يملكون تكلفة علاج ما بهم لان المرض صار ترفا لا يقدرون على ان ينالوه فلما نالوه كان جزاؤهم الموت
هو الظل الذى اجرى اليه من قيظ الحياة و شمسها

هو انا و انت و هو و هم و هؤلاء
هو من امثل له خلية واحدة من ملايين ملايين الخلايا
خلية دورها ان تدافع عنه و تحميه و تبنيه عند النقطة التى خلقت عندها هذا دورها
لكن حين تتفرق الخلايا و تتشرذم و تترك مهمتها
فالمصير هو الهلاك للجميع الكل خاسر لا رابح بيننا
الوطن هو الجسد الذى يربط هذه الخلايا ببعضها
الوطن هو السفينة التى تقلنا جميعا و التى ان تركنا بعضنا يثقبها بحجة ان هذا الجزء ملكه هو و لم نأخذ على يده فالغرق مصيرنا
لاننا نسينا اننا جميعا جزء من هذه السفينة

tarek momen يقول...

الأخت "ماتدوسش علي ف1 "
كلام جميل


الأخت العزيزة سبهللة
اعتقد انك وصلتي للتعريف الصحيح
وطن يعني حب
طبعا الي سافروا للخارج مثل زوجك الفاضل بيبقي احساسهم بالوطن اعلي
بالنسبة لسؤال سيدنا ادم
السؤال فلسفس يعني لو كنتي مكانه كان احساسك بالوطن يبقي شكله ايه

الأخ باسم
اشكر لك تشريفك مدونتي
واهنئك علي اسلوبك الراقي
واوافقك في ارائك
تحياتي للجميع

Foxology يقول...

يا استاذ طارق انا عندى استعداد اهاجر اى حتة بتحترم آدميتى مش لازم تبقى بلد غنيو ولا فيها امكانيات او غيره

نفسى احس بأمان انى ف بلد بتحترمنى

زهرة يقول...

اذيك استاذ طارق

قد نختلف كثيرا في تعرف كلمة وطن
وفالانتماء يختلف من انسان لأخر وأيضا معني الكلمة تختلف من انسان لأخر

فقد يكون وطني هو المكان الذي يوجد به أهلي وأصحابي

أو قد يكون المكان الذي يوجد به عملي

وقد يكون المكان الذي كلما بعدت عنه أشتقت للرجوع اليه

وقد يكون المكان الموجود فيه أعز انسان لدي

وقد يكون المكان الذي سأدفن فيه

فيختلف المعني باختلاف مدي مفهومنا وأحساسنا بالوطن

تحياتي علي البوست الخاص بك
وتحياتي لشخصكم الكريم

tarek momen يقول...

الأصديق فوكس الحكيم
كلاكيت تاني مرة
طيب فيه بلاد كتير ممكن تحترم ادميتك
هل سوف تهاجر اليها وحدك وتترك اهلك و اسرتك واصدقائك و حبايبك و تعيش هناك تشعر من ناحية بالأحترام و من ناحية بافتقاد كل من ذكرتهم سابقا
ام انك ستحاول ان تاخذهم معك ليشعروا بالأحترام هم ايضا وفي هذه الحالة اذا فكرنا جميعا بنفس المنطق سوف نترك مصر خالية من اهلها يرتع فيها الأوغاد
ام الحل الأخير ان نغير من حال بلدنا لنحصل علي الأحترام والأستمتاع برفقة الأهل و الأحباب
مرة تانية جاوب يا بطل
.
.
.
الصديقة ذات العبق الجميل .. زهرة
سؤالي شخصي
يعني احساسك انتي بمعني كلمة الوطن
حاولي تعبري عنه بكلمات بسيطة

Foxology يقول...

اكيد يا استاذ طارق هحاول اخدهم معايا ونسيب البلد

يا استاذ طارق البلد دى والله العظيم مش هينصلح حالها لا دلوقتى ولا بعدين يمكن الحل الوحيد ان قنبلة نووية تجيب عاليها واطيها وبعد 100 سنة لما اثر القنبلة يروح ناس محترمة تيجى تعمرها من جديد وتبنى بلد محترمة يمكن يكون ده الحل لكن غير كدة الله اعلم بأة :)

الوحدة والغربة صعبة ده شئ اكيد لكن الأصعب الغربة جوة الوطن ولا ايه ؟؟

تقبل تحياتى :)

شمس النهار يقول...

لازم تتغرب عشان تعرف معني الكلمه بس تكون اتغربت وانت كبير مدرك الوطن اللي كبرنا فيه عليه اول خطوه مشيتها واول مدرسه دخلتها واول بنت جيران حبيتهاواول اي شئ اتعرفت عليه واول زغروته من مراة البواب مع اول شهاده اخدتها الوطن هو الزكريات والناس اللي زي بعض في كل حاجه حتي الهموم بدليل كل اللي بيهاجروا في النهايه بيرجعوا لما يكبروا ويكونوا في سن اجترار الذكريات لكن اولادهم اللي اتولدوا هناك مابيرجعوش عشان هناك هو ده وطنهم حيث اول اي شئ حيث الذكريات