تابع نقد

استكمالا لما قبله قلنا ان عماد الجيش هم المجندين من شباب المصريين  اللي بيتغيرو كل سنة محموعة تنهي خدمتها و مجموعة جديدة تدخل
فلما سعادتك تقول خير اجناد الارض يبقي المقصود عموم الشعب المصري و ليس فقط الجيش المصري
لانه مش معقول لما ادخل الجيش ابقي خير اجناد و بعدين اخلص خدمتي ابقي اي حاجة و بعدين ييجي لي استدعاء ارجع خبر اجناد هههههههه
و من الملاحظات الغريبة ان الاعلام دايما يتكلم عن الجيش كانه كيان منفصل عن الشعب رغم ان الجيش جزء من كل
يعني ماينفعش اقول مصر جيشا و شعبا بلابلابلا..... لكن اقول شعب مصر بجيشه بشرطته بقلاحيه وكل اطيافه بلابلابلا.........
نيجي بقي للطبقة المحترفة..يعني اللي شغلتها و اكل عيشها انهم ضباط بالجيش المصري
فدول في الاخر مصريين من ارض مصر و ترابها و عايشين برضه في وسط ناسها بيعانوا من كل اللي بيعاني منه المواطن المصري و فيهم برضه عيوب كل مواطن مصري
سيبك من كلام ان الجيش اكثر مؤسسة منضبطة
الكلام ده بيتقال علشان الجيش الاوامر فيه واجبة النفاذ حتي لو كانت غلط..وبالنسبة لنا هو ده الانضباط
لكن جوه الجيش هاتلاقي وسايط و مجاملات و مايمنعش فساد ورشاوي زيه زي اي مؤسسة في بلدنا و ماتتحمقوش قوي و تقولوا مش ممكن
هاحكي لكم حكاية في البوست اللي جاي عشتها بنفسي

تابع نقد

ابتداء لقد اديت خدمتي العسكرية الالزامية  عامي 83_ 1984 كجندي بسلاح الدفاع الجوي وكانت مهمتي راصد جوي اتلقي البلاغات من الرادار و اوقعها علي خريطة زجاجية يتابعها ضابط العمليات
هذه المقدمة ضرورية لبعض الذين يتهمون كل من تسول له  نفسه بانتقاد الجيش بتهمة الخيانة
واعتقد انهم في عقلهم الباطن يفسرون الخيانة بانها خيانة لتوجهاتهم فالوطن ملك لنا جميعا و ليس حكرا علي فئة دون الاخري
يتكون الجيش المصري من العسكريين المحترفين و هؤلاء هم خريجي الكليات العسكرية التي يتخرج منها الضباط و المعاهد الفنية التي تخرج ضباط الصف و الفئة الثالثة هم المتطوعين للخدمة ..اما باقي الجيش واعتقد انه يشكل العدد الاكبر هم الجنود الذين يؤدون خدمة التجنيد الاجباري وهم من المؤهلات العليا و المتوسطة و الجنود بدون مؤهلات
هؤلاء هم عماد الجيش و هم عموم الشعب المصري
فكل الشباب يجب ان يؤدوا الخدمة عدا من له ظروف مرضية او عائلية

نقد

انتباه
سانتقد الجيش
ايوة جيش مصر
ايوة خير اجناد الارض
ليه بقي ؟؟؟ لاني زي ما بانتقد دكاترة مصر و بانتقد مهندسين مصر فمش شايف اي فرق في اني انتقد جيش مصر
لاني عايز مصر احسن بلد في العالم...و عمرها ما هاتبقي احسن بلد طول ما احنا دافنين راسنا في الرمل و بنقول كله تمام و مافيش احسن من كده
يطلع واحد فلوط يقول لي ايوة بس احنا في وسط معركة و ده مش وقته..اقول له اركن علي جنب  النقد لازم يكون في كل وقت..
كفاية كده النهارده ونكمل البوست القادم
الواحد لسه مفتقد لياقة الكتابة علي البلوجر

فاتيما

فاتيما غيرت اسمي من طارق مؤمن الي طارق ممكن
ياتري دي اشارة يا مارد هههههههههه

▲♥ ◊●♪ღ◐°◣( tarek momkenl )◢°◑ღ◊●♪♥▲

اله يبارك ف عمرك يارب
وحاليا انا حاسة انه مبروك عليكم انتم الاول
وبعدين انا بعدكم
:)))
ربنا يخليكم ليا

20 أكتوبر، 2014 11:36 ص

يوسف

ياااااااااااااااااااه الواحد بقي له كتير ماجاش هنا ..بس النهارده قررت افتح المدونة لضوء الشمس احتفالا بحدث افرح المدونات والفيس بوك و تويتر و كل وسائل التواصل الاجتماعي اللي اعرفها و اللي ما اعرفهاش

اما هذا الحدث السعيد هو عودة يوسف لحضن و روح قلب مامته صديقتنا المدونة فاتيما

فهنيئا لها و هنيئا لكل الاصدقاء الذين فرحوا لفرحتها...نقفل بقي علشان رايح الفيسبوك

فتكم بعافية

مسلسلات 2

مسلسل اخر مصري ايضا باسم قلوب بطولة مجموعة ممثلات لا اعرف منهم غير غلا غانم..مش فاهم له هدف او مغزي غير ان المخرج تقريبا فيه واحد قريبه بيمثل دور صغير لواحد حشاش فبني عليه قصة و مسلسل

مسلسلات

علاقتي بالمسلسلات انتهت منذ عهد اسامة انور عكاشة و اصبحت اشاهد لقطات عرضا وانا امر امام غرفة بناتي  واحيانا استفسر منهم عن ملخص قصة المسلسل  وابطاله من باب الاحتياط
المهم لاحظت انهم يتابعون مسلسل باسم هبة رجل الغراب  بطولة ايمي سمير غانم و هو اقتباس من مسلسل امريكي اسمه UGLY BETY ..وهو تقريبا مسلسل كوميدي
المهم لاحظت ملاحظة غريبة جدا  ان المسلسل يشجع علي العلاقات خارج اطار الزواج ممثلا في سكرتيرة مدير الشركة التي تعيش وحدها حياة مستقلة و تدعو صديقها  مدير التسويق بالشركة لمشاركتها شقتها والحياة معها بدون زواج   بعد ان اعترف لها انه مش بتاع زواج و لكنها لاتمانع رغما عن ذلك ان يعيشا سويا
واذا كان هذا ليس مستغربا في مسلسل امريكي فانه مستهجن في مسلسل مصري ضد كل العادات و القيم ولن اقول ضد الشرع و الدين فحتي في اشد الطبقات المصرية انحلالا و تشبها بالغرب فا زال هذا امر مرفوض
الي ماذا يسعي الفن المصري بالضبط؟؟؟؟؟؟؟؟؟؟؟؟؟؟

الصب تفضحه عيونه..مش شرط يكون صب قوي لكن اهو صب و السلام